تعرف إن في شركة جديدة لسه طالعة، بتصمم خدامين بشريين رقميين، عشان يشتغلوا جوه شبكة الإنترنت المتطورة ثلاثية الأبعاد اللي جاية قريب، اللي بيسموها الميتافيرس؟!
طب تعرف إن الخدامين دول هيبقوا أشبه بالعبيد، موجودين بشكل رقمي أو ديجيتال في العالم الإفتراضي فقط، وهيكونوا شغالين بأنظمة ذكاء إصطناعي AI متطورة، بتخليهم يتعلموا من تعاملاتهم اليومية مع البشر العاديين اللي جوه الميتافيرس، عشان يطوروا ذكاءهم على قد ما يقدروا؟!
الشركة اللي بتصمم ده دلوقتي هي شركة نيوزيلاندية اسمها Soul Machines، وبيقولوا إنهم مبدئيًا بيصمموا الخدم البشر الرقميين دول عشان يشتغلوا ف الأعمال البسيطة اللي زي خدمة العملاء والدعاية للمنتجات أو التعليم.. بس الرؤية بتاعتهم وهدفهم في المستقبل هو إنهم يخلوا الذكاء الإصطناعي البشري بتاعهم ده، يكون بداية عمالة رقمية كاملة أعدادها بالملايين، تتولى جميع الوظائف الرقمية اللي هتبقى جوه الميتافيرس!!
الفكرة كلها إن كل شخص فينا بيبقى له شخصية معينة بيغيرها على حسب الحاجة اللي بيعملها.. يعني لو أنت مثلًا بتلعب كورة، فتفكيرك واستيعابك بيبقى له شكل معين، مختلف عن ما لو كنت بتاكل أو بتتفرج على فيلم أو غيره.. شركة Soul Machines بقى هدفهم هو إنهم يصمموا بشر رقميين يتبنوا الشخصيات المميزة دي ويشغلوهم كعمالة رقمية في شبكة الميتافيرس كلها، بدون قيود..
والسيستم اللي جيش الروبوتات الرقمية دي هيشتغل به، إسمه مرعب حبتين.. إسمه بالضبط هو: Humans OS 2.0
ف تخيل أنت..
تخيل إن في شركات Start up بتصمم روبوتات رقمية شبيهة بالبشر وبتتعلم من التعامل معهم بالذكاء الإصطناعي المتطور، عشان يشغلوهم كخدم أو عبيد عندنا كلنا في شبكة افتراضية ثلاثية الأبعاد، حجمها لا يستوعب!!
تخيل أيه اللي ممكن يحصل لو الروبوتات أو البشر الرقميين دول ذكاءهم زاد عن الحد، لدرجة إنه مبقاش عايز يسمع كلامنا كجنس بشري خلاص.. وقرر يتمرد على البشر وعلى كل حضارتهم وجنسهم عشان يتخلص منهم!!
تفتكر ساعتها السيناريو اللي هيحصل هيكون عامل إزاي؟!.. وهنكون وقتها قادرين نلحق نفسنا ولا هيكون فات الأوان خلاص؟!